Die parlement se Artikel 89-ontheffingskomitee wend hom tot die Konstitusionele Hof om teen die hooggeregshof in Kaapstad se uitspraak te appelleer waarin president Cyril Ramaphosa aangedring het om dié komitee se werk tydelik te staak.
Die komitee se voorsitter Makashule Gana, sê ten spyte van verdeeldheid onder die lede, sal hul met hul werksaamhede voortgaan.
“Die besluit van die komitee is dat die uitspraak van die hooggeregshof in Kaapstad geappelleer moet word; dit is ’n verdeelde beslissing, maar dit is nietemin ’n beslissing, en ons sal namens die komitee met daardie appèl voortgaan,” sê Gana.
Die hooggeregshof se uitspraak verhoed die komitee om voort te gaan met openbare verhore, hangende die uitslag van Ramaphosa se hersieningsaansoek.
Die komitee voer aan dat die laerhof die verkeerde regsbeginsels toegepas het deur nie die kanse op sukses van Ramaphosa se hersieningsaansoek te weeg nie.
Die paneel het in November 2022 bevind dat daar ’n prima facie saak teen die president is waarop hy moet antwoord oor die diefstal van $580 000 Amerikaanse dollar in ’n rusbank op sy plaas in Limpopo in Februarie 2020.
Die komitee gaan voort met sy werk, waaronder die hantering van uitstaande prosedurele sake soos die benoeming van bewysleiers en die bepalings van sy verwysingsraamwerk.
