Die Hooggeregshof in Kaapstad sal aan die einde van volgende week sy beslissing bekendmaak oor president Cyril Ramaphosa se dringende aansoek om die parlementêre ontheffingskomitee se werk te staak.
Die aansoek om die parlementêre proses op te skort, hangende ’n hersiening van die artikel 89-paneel se verslag oor die Phala Phala-aangeleentheid, het gister begin.
Die paneel het in November 2022 bevind dat daar ’n prima facie saak teen die president is waarop hy moet antwoord oor die diefstal van $580 000 Amerikaanse dollar in ’n rusbank op sy plaas in Limpopo in Februarie 2020.
Die ontheffingskomitee is aangestel ná ’n beslissing deur die Konstitusionele Hof in Mei vanjaar dat die Nasionale Vergadering irrasioneel opgetree het toe hy teen die implementering van die verslag gestem het.
Opposisiepartye het die aansoek as ’n vertragingstaktiek bestempel en sê dat hy aanspreeklikheid wil vermy.
Ramaphosa se regspan het egter aangevoer dat dit onregverdig sou wees om die ontheffingsproses toe te laat om voort te gaan voordat die hersieningsaansoek aangehoor is.
Die voorsitter van die ontheffingskomitee, Makashule Gana, sê dat die komitee se werk, insluitend die aanstelling van ’n bewysleier én die voorbereiding van getuies, onverpoosd sal voortduur.
Ramaphosa se aansoek om die paneelverslag te hersien sal ván 2 tót 4 September aangehoor word.
