Die Departement van Binnelandse Sake het die grootste vermindering in jare bewerkstellig wat betref die agterstand met appèlle van vlugtelinge in Suid-Afrika.
Die Vlugtelingappèlowerheid van Suid-Afrika (Raasa) se werklas van aktiewe appèlle het ván die einde van 2024 tót die einde van 2025 met 8 800 afgeneem.
Byna 9 000 sake is weens afgehandelde verhore van die lys verwyder.
Raasa het 40 bykomende advokate aangestel en daaglikse verhore vermeerder. Meer kapasiteit word ook in samewerking met die Kaapse Balie na die Wes-Kaap ontplooi.
Die minister van Binnelandse Sake, dr. Leon Schreiber, sê hierdie doeltreffendheid herstel die integriteit van die asielstelsel en verseker dat wettige eise flinker opgelos word.
