Teedrinkers wat bekommerd is oor mikroplastiek in voedsel, begin vrae vra oor wat presies in teesakkies is en hoekom dit nie altyd op verpakking aangedui word nie.
Volgens ’n verbruikersondersoek is sommige gewone teesakkies nie net van papier gemaak nie, maar bevat klein hoeveelhede plastiekkomponente om die sakkies te seël en te versterk.
Teevervaardigers sê dié materiale word as deel van die verpakking beskou, en daarom hoef dit nie as bestanddele op die etiket verskyn nie.
’n Vervaardiger het aan die nuusdiens, EWN, verduidelik dat die hoeveelhede plastiek minimaal is en aan internasionale voedselveiligheidstandaarde voldoen, met instansies soos die Wêreldgesondheidsorganisasie en die Amerikaanse FDA wat dit as veilig beskou.
Hoewel alternatiewe, plantgebaseerde teesakkies al hoe meer beskikbaar raak, sê verbruikerskenners daar is geen rede tot paniek of om noodwendig oor te skakel na los tee nie, aangesien die huidige produkte as veilig beskou word.
