Walter Ernst
Die nasionale tesourie het ernstige ongerymdhede binne die Openbare Beleggingskorporasie se ongenoteerde portefeulje van R170 miljard bevestig.
Luidens ’n verslag deur die minister van finansies, Enoch Godongwana is bewerings van korrupsie in 27 van 40 ondersoeke gestaaf.
Verskeie individue is reeds as misdadige direkteure verklaar, terwyl talle sake vir strafregtelike vervolging na wetstoepassers verwys is. Hierdie optrede volg ná die Mpati-kommissie se bevindinge oor wanbestuur by entiteite soos Daybreak Foods. Die ondersoek het op die beskerming van staatsamptenare se pensioenfondse gefokus.
Hoewel die eerste fase van die hersiening afgehandel is, oorweeg Godongwana die finale aanbevelings om verdere aanspreeklikheid te verseker.
Fotokrediet: Jairus Mmutle / GCIS
