Walter Ernst
Die voormalige minister van bosbou, visserye en die omgewing, Dion George, het amptelik as lid van die DA bedank.
George het gesê dat hy nie langer deel van ’n party kan bly wat deur die aksies van sy leier deur die ANC gekaap is wat die DA volgens hom gesnoer het nie. George is van die standpunt dat die party sy stem en sy vermoë om die land tot voordeel van sy burgers te lei verloor het.
Dít volg nadat die partyleier, John Steenhuisen, hom uit sy amp as minister verwyder het. George het Steenhuisen op sy beurt daarvan beskuldig dat hy die party se kredietkaart misbruik het. ’n Interne ondersoek het Steenhuisen Maandag van alle skuld onthef.
Die DA se federale komitee het intussen ’n ondersoek gelas om te bepaal of die openbare woordewisseling die party se beeld geskaad het.
George is reeds in November as minister deur Willie Aucamp vervang.
Fotokrediet: Gallo Images/Misha Jordaan
