Die nasionale polisiekommissaris, generaal Fannie Masemola, het sy stilswye verbreek nadat die polisiekommissaris in KwaZulu-Natal, luitenant-generaal Nhlanhla Mkhwanazi die afgelope naweek verskeie bewerings teen die minister van polisie, Senzo Mchunu gemaak het.
Volgens Masemola sal hy nié dissiplinêre stappe teen Mkhwanazi doen nie.
LEES OOK: Ramaphosa sal ingryp by geskil tussen Mkhwanazi en Mchunu
Een van die skokbewerings was dat Mchunu en ander hoës in die kabinet bande het met misdaadsindikate, soos die omstrede sakeman, Vusimusi “Cat” Matlala. Die minister is ook van politieke inmenging beskuldig.
Matlala, wat tans verhoorafwagtend is, is met ‘n selfoon in sy sel in die Kgosi Mampuru-gevangenis betrap. Die foon het glo kommunikasie tussen hom en die minister bevat.
Mkhwanazi het tydens Sondag se mediakonferensie gesê dat ‘n taakspan wat polisiemoorde ondersoek, ontbind is weens politieke inmenging. Volgens Masemola het Mkhwanazi die nodige toestemming gekry om die mediakonferensie te hou en het hy (Mkhwanazi) aangedui dat hy oor polisiemoorde gaan gesels.
LEES OOK: Polisiekomitee voorsitter: “As bewerings teen Mchunu waar is kan dit wys op gekaapte SAPD”
Hy sê bykomende veiligheid is vir Mkhwanazi gereël nadat daar verskeie doodsdreigemente teen hom gemaak is.
Masemola sê die hele polisiediens is geraak deur die provinsiale kommissaris se bewerings en het erken dat dit Suid-Afrikaners se vertroue in die polisie afneem.
One Response
Hy weet wat is goed vir hom!
Wie het die doodsdreigemente gemaak? Ons het die reg om te weet!