Die Suid-Afrikaanse Onderwysersunie, die SAOU, sê hy verwerp die nalatige optrede van beide die onderwys departement in Limpopo, asook die Limpopo departement van sport, kuns en kultuur.
Dit kom nadat Limpopo-leerlinge op busse moes slaap omdat daar nie vir hulle verblyf gereël is in Bloemfontein, waar hulle aan die Suid-Afrikaanse Skole Atletiek-kampioenskappe deelgeneem het.
Die uitvoerende hoof van die SAOU, Paul Sauer sê die atlete, en hulle afrigters berei reeds maande lank vir die kampioenskappe voor, maar is deur beide die onderwys-, en sportdepartemente in die steek gelaat.
Sauer sê hulle het inligting van die SAOU se voorsitter in Limpopo ontvang dat die leerlinge ook die openingseremonie misgeloop het omdat hulle laat was.
Verder is die besluit geneem dat die atlete, weens die swak omstandighede waaraan hulle onderwerp is, vroeër na Limpopo moes terugkeer. Dit het daartoe gelei dat baie van die atlete hulle finale items misgeloop het.
Hy sê hierdie gebeure wys op ‘n sistemiese mislukking om die regte en waardigheid van leerders onder die Departement se sorg te verseker. “Die SAOU sal nie langer hierdie vlak van wangedrag ongesiens laat verbygaan nie.” .
