30 Julie 2025
Die 800-miljoenrandse suurstofaanlegtender wat deur die Onafhanklike Ontwikkelingstrust, die IDT, aan die diensverskaffer, Bulkeng, en ander private kontrakteurs toegeken is, is deurspek met sistemiese verkrygingsonreëlmatighede en bedrog. Dít, volgens Price Waterhouse Coopers, wat dié kontrak forensies ondersoek het.
Die kontrak is in 2022 namens die departement van gesondheid aan Bulkeng toegeken vir mediese suurstofaanlegte by 55 openbare hospitale. Wat aanvanklik R250 miljoen sou kos het egter tot R836 miljoen vermeerder.
Die minister van openbare werke en infrastruktuur, Dean Macpherson, wat die ondersoek versoek het, het die bevindings van die verslag bekend gemaak.
Die departement sê teen die tyd dat hy die tender kon stop, het die regering reeds bykans R13 miljoen daaraan bestee.
Volgens die forensiese verslag het Bulkeng nie aan die vereistes van die tender voldoen nie en nie akkreditasie by die Suid-Afrikaanse Gesondheidsreguleringsowerheid bekom nie.
Die ondersoek het die algehele bodevaluasieproses gebrekkig verklaar.
Die verslag beveel verder dissiplinêre stappe teen die IDT se uitvoerende hoof, Tebogo Malaka, die trust se hoofbestuurder vir voorsieningskettingbestuur, Molebedi Sisi en ander beamptes aan.
Die minister van gesondheid, dr. Aaron Motsoaledi, het die verslag verwelkom.
Motsoaledi het benadruk dat die oomblik toe die ongerymdhede in die Daily Maverick onthul is, hy saam met minister Macpherson die IDT as projekbestuurder verwyder en die Ontwikkelingsbank van Suider-Afrika aangewys het, sodat die lewensbelangrike suurstof steeds gelewer kon word.
Fotokrediet: Unicef
