Die Suid-Afrikaanse Onderwysersunie (SAOU) sê die Vrystaatse Onderwysdepartement het uiteindelik uitstaande bedra aan die staat se mediese skema (GEMS) oorbetaal.
Dit kom nadat die SAOU met regstappe teen die departement begin het nadat die departement versuim het om die lidmaatskap bydraes van lede aan GEMS te betaal.
Die uitvoerende beampte van die SAOU, Paul Sauer sê hulle het bevestiging gekry dat die geld op 2 April betaal is.
“Die SAOU het pro-aktief opgetree en die Arbeidshof op ʼn dringende basis genader, om so te verseker dat die pligsversuim van die departement, wat daartoe sou gelei het dat lede se gesondheid op die spel geplaas word, aangespreek word,” sê Sauer.
Hy sê hulle was bekommerd dat die onderwysers in die Vrystaat hulle lidmaatskap sou verloor omdat die geld nie betaal word nie. “Die SAOU sal alles in sy vermoë doen om te verseker dat die diensvoorwaardes van ons lede beskerm sal word en dat provinsies wat hulle verantwoordelikhede teenoor werknemers nie nakom nie, aanspreeklik gehou word.”
