Die vermoorde Vicki Terblanche (42) se kêrel, Reinhardt Leach, is vanoggend in die hooggeregshof in Gqeberha/ Port Elizabeth aan haar moord skuldig bevind.
Terblanche se liggaam is op 23 Oktober 2021 in ‘n vlakgraf op ‘n kleinhoewe naby groenbossies gevind. Nog ‘n beskuldigde in die moordsaak, Dylan Cullis, is in Oktober 2023 skuldig bevind en tot 18 jaar gevangenisstraf gevonnis nadat hy sy rol in die moord erken het.
Terblanche se vervreemde man, Arnold, word ook van die moord op Vicki aangekla.
Leach het tydens sy hofsaak aangevoer dat Arnold hom geld aangebied het om Vicki te vermoor. Ten tyde van haar moord, was Vicki en Arnold in ‘n bitter ekskeiding gewikkel, te midde van ’n stryd om toesig oor hul minderjarige kind.
Arnold word in Oktober afsonderlik verhoor vir die moord op Vicki.
