Twee buitelandse burgers is in Erasmia, noord van Centurion, in hegtenis geneem nadat hulle na bewering by ’n groot, onwettige dwelmvervaardigingslaboratorium betrap is.
Die polisie sê die fasiliteit het moontlik tot 800 000 Mandrax-tablette per dag vervaardig.
Die operasie is deur misdaadintelligensie beplan en deur die SAPD en Valke uitgevoer.
Die presiese straatwaarde van die beslaglegging is nog nie bepaal nie, maar dit word op miljoene rand geraam.
Die nasionale polisiekommissaris, luitenant-generaal Tebello Mosikili, sê die operasie vorm deel van ’n groter veldtog teen georganiseerde dwelmsindikate.
Hy sê meer as 9 000 verdagtes is die afgelope vier weke in hegtenis geneem vir dwelmhandel of -besit.
