Suid-Afrikaners se rybewyse sal voortaan vir tien jaar geldig wees. Die kabinet het die groen lig gegee vir dié verlenging ván vyf tót tien jaar.
Volgens die minister in die presidensie, Khumbudzo Ntshavheni sal die wysiging vir ligte voertuie en motorfietse, insluitend kodes A, A1, B en EB, geld.
Swaar kommersiële voertuie en voertuie wat vir openbare vervoer gebruik word, sal steeds onderhewig wees aan hernuwingstydperke wat wissel tussen twee en vyf jaar.
Die verlenging is twee jaar langer as die agtjaar-geldigheidstydperk wat voorheen deur die Departement van Vervoer voorgestel is.
Ntshavheni sê dat hierdie besluit op voortdurende probleme met die land se enigste lisensiedrukker volg wat herhaaldelik ingegee en groot agterstande meegebring het.
Dié besluit strook met internasionale standaarde en sal druk op die stelsel verlig en vir motoriste tyd en geld spaar.
Ntshavheni sê egter dat die besluit wetswysigings vereis alvorens dit in werking kan tree. Motoriste word daaraan herinner om steeds hul lisensies wat verval te hernu.
