3 Desember 2024
Die ontbinde liggaam van ‘n vermeende onwettige mynwerker is vroeër vanmiddag uit skag 11 van die Stilfontein-myn in Noordwes gehaal.
Die gemeenskap se vrywilligers het vroeër kos in die skag laat afsak, waarna die liggaam na die oppervlak gestuur is.
Die gemeenskapsleier, Mandla Charles, sê daar is nog liggame ondergronds en die onwettige mynwerkers wat steeds onder die grond is, eis dat toue verskaf word om nog oorledenes na die oppervlakte te stuur.
Volgens berigte het die onwettige mynwerkers glo notas na die oppervlak gestuur, en gesê dat vyf mense reeds dood is. Hulle meen die reuk van ontbinding ondergronds is ondraaglik.
Die myn is reeds ‘n geruime tyd in die nuus weens talle onwettige mynwerkers wat die afgelope ruk ondergronds bly, en weier om na die oppervlak te kom.
Foto: X
