13 November 2024
Die vakbond Solidariteit het ‘n klagte by die persombud van Suid-Afrika teen die koerant, Sunday World ingedien.
Volgens die vakbond se adjunkbestuurshoof, advokaat Anton van der Bijl hou die klagte verband met onwaarhede in dié koerant se redaksionele kommentaar onder die opskrif: “Moegoe: AfriForum” die afgelope Sondag.
Van der Bijl voeg by dat die skrywer in dié kommentaar – waarin die Bela-protesoptog onder leiding van die Solidariteit Beweging gekritiseer word – verskeie valshede kwytraak.
LEES OOK: Solidariteit: Dit is nou tyd vir praat oor Bela
Daar word onder meer verwys na AfriForum en sy bondgenote as organisasies wat die apartheidvlag tydens die protesoptog laat wapper het. “Verdere beskuldigings in die kommentaar is dat die oranjekleurige T-hemde wat by die geleentheid gedra is verteenwoordigend van die apartheidsvlag mag wees.”
Hy sê hierdie kleur is welbekend as die korporatiewe kleur van die Solidariteit Beweging en hou sterk verband met ʼn veel ouer Afrikanergeskiedenis.
Van der Bijl sê Solidariteit vra die ombud om ’n verskoning van die publikasie te eis om só die valshede oor die protesoptog en die organisasies wat dit vreedsaam gelei het, te takel.
