18 Desember 2024
Solidariteit het ʼn voorstel aangekondig vir ʼn oplossing vir die voortslepende BELA-geskil.
Die vakbond het ook ʼn uitnodiging aan die onderwysvakbond, SADOU gerig vir gesprekke. Volgens die bestuurshoof van Solidariteit, dr. Dirk Hermann, is daar ʼn groter kans om die geskil op te los as werkers met mekaar in gesprek tree, eerder as dat politieke partye met mekaar baklei.
Hy sê die fokus van die gesprek met SADOU sal wees op moedertaalonderrig vir alle Afrikataalsprekers.
Hermann sê Solidariteit glo sy voorstel bied ‘n wen-wen oplossing wat vir die ANC, DA, SADOU en AfriForum aanvaarbaar sal wees. Solidariteit stel ook voor dat verdere gesprekke oor BELA deel vorm van die komende nasionale dialoog.
Volgens hom is daar geen wettige wyse waarop die Bela-wet in sy geheel geïmplementeer kan word nie.
