8 Junie 2022
Die burgemeesterskomiteelid vir omgewing en infrastruktuur in Johannesburg, Michael Sun sê die metro is bewus van swak luggehalte in die stad nadat talle mense vanoggend met ‘n stank in die lug wakker geword het.
Sun sê die oorsaak van die reuk is nog onbekend, maar sê sy departement ondersoek die oorsaak. Hy sê sodra hulle moontlik agter die kap van die byl kom sal hulle inwoners inlig.
GautengWeather het op Twitter gesê dat winde van Mpumalanga moontlik die reuk veroorsaak. Talle sosiale media-gebruikers probeer ook vasstel wat so ruik.
Die slegte reuk in Gauteng is egter niks nuuts nie met die Wêreldgesondheidsorganisasie wat in 2013 bevestig het dat 20 000 Suid-Afrikaners in daardie jaar dood is weens lugbesoedeling.
Ook in Februarie 2021 is Johannesburg oorval deur ‘n slegte reuk, wat deur lugbesoedeling veroorsaak is.
