Die akteur en regisseur, Robert Redford, is in die ouderdom van 89 in sy huis in Utah, Amerika oorlede.
Redford, wie se loopbaan oor ses dekades gestrek het, het in sy slaap gesterf. Volgens sy publisiteitsagent, Cindi Berger, is die oorsaak van sy dood nog nie bekend nie.
Die akteur, bekend vir sy kenmerkende golwende kuif en sproete, het sy deurbraak in 1969 in die rolprent Butch Cassidy and the Sundance Kid gemaak, waarin hy teenoor Paul Newman gespeel het.
Hy was ook die medestigter van die bekende Sundance-rolprentfees vir onafhanklike filmmakers.
Buiten sy bydraes tot die rolprentwêreld was Redford ook ‘n toegewyde omgewingsaktivis wat hom beywer het vir die bewaring van die natuurlike omgewing in Utah.
