Die Port Alfred-belastingbetalers- en inwonersvereniging het die Hooggeregshof in Makhanda genader om die Oos-Kaapse Geografiese Naamsveranderingsraad se openbare deelnameproses onwettig te laat verklaar.
Die vereniging sê inwoners is nie behoorlik ingelig oor die agtergrond en motivering vir voorgestelde naamveranderings nie, en dat die raad nie die vereiste wetlike prosedures gevolg het nie.
Die raad oorweeg onder meer om Port Alfred na iCawa of iCoyi te verander en die Kowie-rivier na iQoyi.
Volgens die aansoek is belangrike dokumente nie vooraf beskikbaar gestel nie, wat sinvolle openbare deelname verhinder het.
Die raad ontken dat daar reeds ’n finale besluit geneem is en sê die proses is nog aan die gang en sal inklusief en deursigtig wees.
