19 Desember 2024
2024 was weer ‘n besige jaar wat nuus betref.
In Suid-Afrika was daar ‘n Nasionale Verkiesing, die Regering van Nasionale Eenheid (RNE) is op die been gebring, en Amerika het sy 45ste president, Donald Trump verkies. Máár te midde van al hierdie groot gebeure was daar ook nuus wat ons laat skaterlag het, nuus waaroor ons kop gekrap het, en selfs net nuus wat ons verward, en moedeloos gelaat het.
Op 27 Julie het die Olimpiese Spele se openingseremonie in Parys, Frankryk alle nuuskanale en sosiale media-platforms oorheers. Ook byna 1000 kommentare is op Pretoria FM se Facebook-plasing gemaak oor die Franse sanger, en akteur, Philippe Katerine wat van kop tot tone in blou verf skielik sy voorskyn gemaak het. Mense het onder meer gevoel hy dryf die spot met die Christen-geloof.
LEES OOK: Australiese briekdanser as die wêreld se “beste” aangewys
‘n Nuwe sportsoort by vanjaar se Olimpiese Spele het vir groot vermaak gesorg nadat die Australiese briekdanser Raygun haar unieke danspassies opgevoer het. In een beweging wil dit voorkom as Raygun (Racael Gunn) soos ‘n kangaroe rondbeweeg. Daar is vir weke tydens en ná die Olimpiese Spele die spot met haar gedryf.
‘n Omstrede, sogenaamde “kunswerk” wat Comedian gedoop is, is vir $6,2-miljoen by ‘n veiling verkoop. Die “kunswerk” deur die Italiaanse kunstenaar, Maurizio Cattelan, is gemaak deur ‘n piesang met kleefband teen ‘n muur op te plak. ‘n Kripto-entrepreneur, Justin Sun het die piesang gekoop waarna hy hom geëet het.
LEES OOK: Jy kan nou ‘n graad as Smaakmaker verwerf
‘n Universiteit in Ierland het een van die eerste universiteite geword om ‘n smaakmakersgraad (influencer) bekend te stel. Om ‘n smaakmaker te wees word in die afgelope paar jaar as ‘n loopbaankeuse beskou vir jong mense in die sosiale media-era. Smaakmakers skep inhoud, en maak geld deur advertensies op hulle verskeie sosiale media-platforms.
Die Suid-Oos Tegnologiese-universiteit in Carlow, Ierland sê die kursus beloof om onder meer studente te leer om inhoud te skep vir spesifieke platforms soos TikTok, Instagram en YouTube.
In September het opposisiepartye en organisasies in die Tshwane-metro hul bes probeer om die burgemeester, Cilliers Brink, in sy pos te hou nadat ‘n mosie van wantroue teen hom geslaag het. Dit kom nadat ActionSA die veelparty-koalisie in die metro verlaat het, en saam met die ANC en die EFF gewerk het om Brink uit die kussings te lig.
Tans is Action SA se dr. Nasiphi Moya die burgemeester van die metro, en is lede van die EFF en die ANC aangewys as burgemeesterskomiteelede.
LEES OOK: Thabo Bester bring hofaansoek vir rekenaar, internetverbinding én koerante
Die sogenaamde Facebook-verkragter, Thabo Bester het in 2024 verskeie hofaansoeke gebring vir toegang tot ‘n rekenaar, koerante en internetverbinding terwyl hy in die tronk is. Volgens hom het hy nie toegang tot enige inligting nie en vra daarom vir internetverbinding én ‘n daaglikse koerant.
Talle van die EFF se langsdienende en lojale lede het die party na die verkiesing in Mei die rooi berette vir Jacob Zuma se MK-party verruil. In Augustus het die EFF-leier, Julius Malema se vriend en adjunk-leier, Floyd Shivambu die EFF verlaat. Hy dien tans in die MK-party. Ook die voormalige openbare beskermer, advokaat Busisiwe Mkhwebane is na ‘n jaar by die EFF nou ‘n lid van die MK-party.
Die aangewese president van Amerika, Donald Trump is in Julie tydens ‘n verkiesingsbyeenkoms in Butler, Pennsylvanië teen sy regteroor geskiet. Die skietvoorval is as ‘n sluipmoordpoging beskryf.
LEES OOK: Donald Trump by saamtrek geskiet
