Esmarie Yssel
Die Namibiese politikus, Adolf Hitler Uunona, het sy middelnaam amptelik uit sy identiteitsdokument laat verwyder.
Die beweegrede daaragter is glo omdat hy sy naam oor die jare te veel moes verduidelik.
Die 59-jarige Uunona is egter ’n gewilde Swapo-politikus en is vir die vyfde agtereenvolgende keer herverkies in die klein noordelike kiesafdeling van Ompundja in die Oshane-streek.
Hy het sy kommer uitgespreek dat sy doopname vir hom ’n beeldprobleem kan skep en het kort voor die 2025 plaaslike verkiesing versoek dat hy voortaan net as Adolf Uunona wil bekend staan.
Uunona het vroeër aan die Duitse koerant, Bild, gesê dat hy niks te doen het met Nazi-ideologie nie, maar dat sy pa waarskynlik nie verstaan het waarvoor Adolf Hitler gestaan het nie.
Duitse name is algemeen in dié buurland wat tussen 1884 en 1915 ’n Duitse kolonie was, nadat hy tydens die Eerste Wêreldoorlog deur die Westerse Geallieerde magte oorgeneem is.
