21 November 2024
Die VF Plus sê die proses wat gevolg word om departementele eksamenvraestelle in Limpopo af te lewer, is kommerwekkend.
Dit volg na die jongste voorval in die Mopani-distrik, waartydens die graad 11-departementele Aardrykskundevraestel tot komende Maandag uitgestel moes word.
Volgens ’n verklaring deur die VF Plus sal dit beteken dat leerlinge – wat nie die Aardrykskundevraestel gister kon skryf nie – ’n ander vraestel op komende Maandag sal skryf.
Die party sê dit is van kritieke belang dat die onderwysdepartement – wat verantwoordelik vir die bestuur van die afleweringsproses is – beter kontroles moet instel ten einde die laat aflewering van vraestelle te voorkom.
Die VF Plus meen die saak moet dringend ondersoek word.
