15 November 2024
Die borgtogaansoek van Louis en Dezzi Liebenberg is tot 21 November uitgestel.
Die egpaar het vanoggend in die landdroshof in Bronkhorstspruit verskyn. Die twee staan saam met sewe ander tereg op aanklagte van onder meer bedrog, diefstal, rampokkery en geldwassery.
Die ander beskuldigdes is reeds op borgtog vrygelaat. Dezzi ontken alle klagtes teen haar en voer aan dat dit in belang van geregtigheid is dat sy op borgtog vrygelaat word. Sy meen sy is nie ‘n vlugrisiko nie.
Volgens haar regsverteenwoordiger kan sy R20 000 vir haar borgtog bekostig. Geld wat sy glo by ‘n vriend sal leen.
Ná die uitstel van die saak het Dezzi gehuil.
Die sitting van vanoggend was ook nie sonder drama nie. Netwerk24 berig dat Liebenberg die Rapport–joernalis, Johan Eybers daarvan beskuldig het dat hy hom in die hof probeer uitlok. Volgens Liebenberg trek Eybers vir hom gesigte om sy aandag te probeer trek.
Eybers het aan landdros Vusimuzi Mahlangu gesê dat hy net sy werk doen deur foto’s van die egpaar op sy selfoon te neem, en dat hy hulle nie probeer uitlok nie.
