24 Januarie 2025
Die president van die Reserwebank, Lesetja Kganyago is vroeër vandag eenparig tot nuwe kanselier van die Universiteit Stellenbosch (US) verkies.
Die kom nadat oudregter, Edwin Cameron se termyn in Desember verlede jaar verstryk het.
Kganyago het in 2018 ʼn eredoktorsgraad van die US ontvang. Die huidige vise-kanselier, en rektor van die US, prof. Wim de Villiers meen Kganyago se aanstelling sal talle studente inspireer.
Kganyago het ʼn meestersgraad in ontwikkelingsekonomie aan die Universiteit van Londen se School for Oriental and African Studies en ʼn baccalaureusgraad in die handel (BCom) in rekeningkunde en ekonomie aan die Universiteit van Suid-Afrika behaal.
Hy het in ‘n verklaring gesê dat tersiêre instellings ‘n belangrike rol speel in die vorming van toekomstige leiers. Volgens hom beskou hy die US as dinamies, en sien hy daarna uit om jong mense te inspireer om hulle volle potensiaal te bereik.
