Die Kaapstad-metro gaan sy eie metropolisie speurtak op die been bring om bendegeweld en misdaad hok te slaan.
Die DA-leier en burgemeester van dié metro, Geordin Hill-Lewis, het vandag ’n optog teen geweldsmisdaad op die Kaapse Vlakte gehou, waar nagenoeg 200 speurdeurposte tans onbeman is.
“Die 200 speurders is veronderstel om in ondersoek te stel na bendemoorde, verkragtings en rooftogte – waaronder die Zandkloofstraat-saak.
Maar hierdie sake vorder stadiger as wat hulle behoort, of vorder glad nie, omdat die persoon wat dit moes ondersoek, nie daar is nie,” sê Hill-Lewis.
Volgens Hill-Lewis, sal dié nuwe eenheid reeds net ná die verkiesing op 4 November met die opleiding van ondersoekers met sy werksaaamhede begin.
Hy sê dat die metro ook gereed vir ’n regstryd teen die nasionale regering is om die nodige ondersoekbevoegdhede af te dwing.
Hill-Lewis sê dat hy tydens sy termyn as burgemeester met drie polisieminister gewerk het wat leë beloftes gemaak het.
“Hulle het my die wêreld belowe, maar niks gelewer nie. Die feit is dat ons nasionale regering nie ernstig is oor die wen van die stryd teen misdaad nie.”
Hill-Lewis sê hiermee dat die stadsraad wil verseker dat geweldsmisdadigers suksesvol vervolg en gevonnis word om veiligheid op die Kaapse Vlakte te herstel.
