Die unieke dorpie Middelpos in die Roggeveld gaan in Mei vir die eerste keer in dekades van eienaar verander. Die huidige eienaar, Koos van der Westhuizen, het bevestig dat die nedersetting ná 46 jaar in familiebesit op 21 Mei deur Home and Hectare op veiling geplaas word.
Middelpos, geleë tussen Calvinia en Sutherland, het ’n ryk geskiedenis wat tot in 1860 terugstrek, toe dit deur Daniël Tomlinson as handelspos gestig is. Sedertdien het dit verskeie eienaars, ’n rol in die Anglo-Boereoorlog en selfs ’n tydperk as belangrike Karoo-handelsentrum onder Joel Sher beleef.
Die eiendom, wat deel van die groter Stinkkuil-plaas (3 000–4 000 ha) vorm, bestaan uit 103 hektaar en lok reeds groot belangstelling van voornemende kopers.
