Die onderwysaktivistegroep, Equal Education het ‘n beroep op die regering gedoen om psigo-sosiale maatreëls in te stel om te verseker dat boelie by skole uitgeroei word.
Die organisasie se pleidooi aan die departement van basiese onderwys volg ná die beweerde voorvalle van aanranding en boeliegedrag by die Milnerton High School.
Die agt graad-11-leerlinge van die skool het vroeër in die Kaapstad-landdroshof op aanklagte van aanranding met die doel om ernstig te beseer verskyn, nadat ‘n video op sosiale media verskyn het wat wys hoe hulle ‘n 16-jarige seun aanrand.
Die organiseerder van Equal Education, Makanatsa Ziyambi, sê die regering het ‘n maatskaplike verantwoordelikheid om boeliegedrag in skole in die kiem te smoor.
Die departement van onderwys in die Wes-Kaap het intussen bevestig dat Milnerton High die regte prosedure gevolg het toe voorvalle van beweerde boeliegedrag verlede week by die skool aangemeld is.
