11 November 2024
Die omstrede Nasionale Gesondheidsversekering (NGV) sal oor die mediumtermyn nagenoeg R3-miljard kry om voor te berei vir die volle inwerkingstelling van dié skema.
’n Bedrag van R2,5-miljard is as basislyn vir ’n indirekte toekenning oor die 2025 mediumtermyn-bestedingsraamwerk toegeken en die direkte NGV-toelaag is sowat R460-miljoen per jaar.
Volgens die tesourie wil die nasionale Departement van Gesondheid poog om die openbare gesondheidsorgstelsel te versterk ter voorbereiding vir die implementering van NGV.
Die tesourie se begrotingshoof, Edgar Sishi, sê die doel van die toekenning sluit die ontwerp van NGV in deur innoverende toetsing van nuwe hervormings – en die verbetering van die gehalte van dienste by primêre gesondheidsorgfasiliteite.
