Die Ekurhuleni-metro het ’n groot veldtog van stapel laat loop om sowat 3-duisend metropolisiebeamptes te ondersoek na bewerings van omvangryke korrupsie wat tydens die Madlanga-kommissie van ondersoek aan die lig gekom het.
Die proses het gister begin en en sluit biometriese vingerafdrukskanderings en agtergrondondersoeke in om te bepaal of beamptes met misdadige bedrywighede verbind kan word.
Die veldtog volg op korrupsie-aanklagte teen senior EMPD-beamptes, insluitend die voormalige hoof, Julius Mkhwanazi, wat glo bande met die beweerde misdadiger, Vusimuzi “Cat” Matlala het.
Ander beamptes word daarvan beskuldig dat hulle ’n persoon vermoor en van die liggaam probeer ontslae raak het.
Die Suid-Afrikaanse Munisipale Werkersunie (Samwu) sê intussen daar is geen regverdiging vir die ondersoeke nie en beskryf dit as ’n skending van werkers se regte.
