Die regering het onderneem om alle uitstaande e-tol-skuld amptelik af te skryf.
Volgens die minister in die presidensie, Khumbudzo Ntshavheni, sal die Nasionale Tesourie die uitstaande finansies oorneem.
Dié besluit volg nadat die kabinet die amptelike beëindiging van die Gautengse hoofwegverbeteringsprojek goedgekeur het. Dit beteken dat die invordering van alle agterstallige e-tol-skuld onmiddellik gestaak word en gepaardgaande regsaksies laat vaar sal word. Dit volg op die aanvanklike opskorting van die stelsel in April 2024.
Ntshavheni het dit egter duidelik gemaak dat motoriste wat in die verlede getrou betaal het, geen terugbetalings sal ontvang nie, aangesien die wetgewing destyds geldig was.
