Marelize Maré
Een van die vermeende moordenaars van die 77-jarige At Mahne, ‘n boer van Baltimore, in Limpopo, is vroeg vanoggend in hegtenis geneem. Die verdagte was glo ‘n werker op Mahne se plaas.
Bosveldmisdaadondersoeke se oudkolonel Sakkie Louwrens het saam met die polisie se eenheid vir geweldsmisdade die verdagte in die Ellisras-gebied in hegtenis geneem.
Mahne is Saterdagmiddag op sy plaas oorval en vermoor en sy vrou, Petro is tydens die voorval beseer. Sy is onlangs uit die hospitaal ontslaan.
Die DA in Limpopo het intussen sy opregte meegevoel uit gespreek met die Mahne-familie en die Baltimore-gemeenskap.
Die party sê een plaasaanval is een te veel en dat die gebrek aan voldoende polisiëring plattelandse gemeenskappe kwesbaar laat teen misdadigers wat sonder vrees optree.
Die DA sê hy het herhaaldelik die minister van polisie aangemoedig om plaasaanvalle en plaasmoorde as prioriteitsmisdade te verklaar.
