Die GOOD-party wil hê die Madlanga-kommissie van ondersoek moet in ’n permanente polisie-integriteitstribunaal omskep word om korrupsie en sogenaamde “vrot appels” in wetstoepassing voortdurend uit te roei.
Die party se Kaapstadse burgemeesterskandidaat, Brett Herron, sê Kaapstad is Suid-Afrika se bende- en moordhoofstad en daarom moet die metro se probleme onder die nasionale soeklig wees.
GOOD wil hê so ’n tribunaal moet onder meer beweerde korrupsie, die boumafia en moontlike samewerking tussen bendes en polisiebeamptes ondersoek.
Herron sê hoewel die skoonmaak van die polisie nie op sy eie die land se gevestigde bendekultuur sal beëindig nie, is aanspreeklikheid en die oppergesag van die reg noodsaaklik.
