Die minister van polisie, Firoz Cachalia, het pas die jongste misdaadsyfers vir die derde kwartaal van 2025 bekendgemaak.
Cachalia sê dat daar tussen 1 Oktober en 31 Desember 2025 ’n daling in geweldsmisdaad was, met die moordsyfer wat volgens die polisie se data met 8,7% afgeneem het. Daar is egter steeds in die tydperk 6,351 in suid-Afrika vermoor. Kontakmisdade het met 6,7% afgeneem.
Ondanks dié afname bly misdaadvlakke hoog, veral weens bendegeweld in die Wes-Kaap, Oos-Kaap en Gauteng.
Die polisie sê sy visier is nou ingestel om georganiseerde misdaad en gesinsgeweld te bekamp. Cachalia sê dat planne beraam word om onwettige vuurwapens te verwyder en ’n gemeenskapspatrollieprogram op die been te bring.
Soldate van die Suid-Afrikaanse Nasionale Weermag sal ook binnekort in hoërisiko-gebiede ontplooi word om stabiliteit te herstel. Die minister het toegegee dat hoewel die nasionale tendense afwaarts neig die misdaadvlakke in die land steeds onaanvaarbaar hoog is.
“Hoewel die meeste gemeenskappe ’n afname in gewelds- en eiendomsmisdade aangemeld het, is daar steeds te veel gemeenskappe wat ’n toename aangemeld het. Dit beteken nie noodwendig dat daar ’n gevoel van veiligheid by individue, gesinne en in gemeenskappe is nie,” het Cachalia gesê.
Die moordsyfer het in vyf provinsies in dubbelsyfers afgeneem, insluitend KwaZulu-Natal, Gauteng, Mpumalanga, die Vrystaat en Noordwes. Die afname is egter veel kleiner in die Wes-Kaap en Oos-Kaap en daar’s ’n effense styging in Limpopo en die Noord-Kaap aangemeld. Uit die 30 polisiegebiede in die land met die hoogste moordkoers is verbetering in slegs 15 bespeur.
Minister Cachalia sê moorde wat met bendegeweld in die Oos- en Wes-Kaap verband hou is onthutsend.
Hy het ook sy kommer oor die toename in polisiemoorde uitgespreek.
