Marelize Maré
Die regering het die groen lig gegee om die klein modulêre kernreaktorprogram, wat die ontwikkeling van kernkragtegnologie sal toelaat, te laat herleef.
Die projek is egter in 2010 gestaak ná vertraagde tydlyne en kostes wat oorskry is.
Die Suid-Afrikaanse Kernkragkorporasie, NECSA, sal nou samesprekings met internasionale vennote en beleggers kan voer om die projek verder uit te brei.
Dit sal die regering se Geïntegreerde Hulpbronplan, wat op kernkrag en hernubare hulpbronne steun om die meerderheid van die land se energie teen 2039 op te wek, verder versterk.
Die minister in die presidensie, Khumbudzo Ntshavheni, sê die herlewing van die projek sal aan Suid-Afrika die geleentheid gee om ’n kritiese rol in die ontwikkeling van klein modulêre reaktortegnologie te speel.
Die kabinet het dié besluit, om die leeftyd van Koeberg-eenheid 2 met nóg 20 jaar tot 2045 te verleng, verwelkom en het sy tevredenheid uitgespreek oor die registrasie van 181 nuwe-generasie-aanlegte met ’n beleggingswaarde van meer as R30 miljard.
