Adjunkpresident Paul Mashatile sê die regering moet die onteiening van grond en eiendom vir die openbare belang versnel.
Hy glo dit kan gedoen word deur die Wet op Grondonteiening, sonder om die Grondwet te wysig om onteiening sonder vergoeding uitdruklik toe te laat.
Mashatile het in die Nasionale Vergadering op vrae van die MK-party en die EFF geantwoord, wat wou weet of die Regering van Nasionale Eenheid beplan om wetgewing in te stel om die Grondwet te wysig ná die EFF se vorige mislukte poging.
Die MK-party het hom daarvan beskuldig dat die ANC sy kongresbesluit oor onteiening sonder vergoeding versaak het, maar Mashatile sê die regering bly daartoe verbind om grond beskikbaar te stel, veral vir landboudoeleindes.
Hy het beklemtoon dat onteiening sonder vergoeding reeds plaasvind waar dit in die openbare belang is, maar dat die proses vinniger moet geskied.
