Die Raad van die Padongelukkefonds, die POF, het een van sy forensiese hoofde verdedig, nadat dit aan die lig gekom het dat sy by wangedrag en wanbestuur betrek word.
Dit hou verband met die onreëlmatige besteding van bykans R800 miljoen wat in vier verskillende ondersoeke uitgewys is.
Ondersoeke van die hooggeregshof in Pretoria, die Spesiale Ondersoekeenheid, ’n verslag van die regspraktyk van Mashiana, Moodley en Monama, asook ’n ondersoek van die departement van arbeid het dié grootskaalse onreëlmatighede uitgewys.
Daar word beweer dat die forensiese hoof, Katlego Mocwiri, ’n hofbevel verontagsaam het.
Die SOE het bevind dat sy glo die forensiese kontrak in April 2022 verleng het, ondanks die hofbevel wat dit onwettig en ongeldig verklaar het en sy reeds in November 2020 daarvan in kennis gestel is.
Fluitjieblasers wat die instelling van die onreëlmatighede in kennis gestel het, sê die POF het versuim om teen Mocwiri op te tree, ten spyte daarvan dat die fonds voorstelle van drie van die vier ondersoeke ontvang het.
Volgens die nuusdiens, City Press, het die raad se voorsitter ’n brief aan die POF se waarnemende hoof gestuur om hom te keer om dissiplinêre optrede teen Mocwiri in te stel. Hy is egter verlede week deur die raad geskors.
Die POF-raad hou voet by stuk dat Mocwiri ’n minimale aandeel in die skandaal gehad het.
Fotokrediet: Unsplash/Victor Sanchez
