‘n Motoris wat herhaaldelik oor ‘n man gery het, en sy dood veroorsaak het, word steeds deur die polisie gesoek – tien dae ná die voorval.
‘n Video het aan die lig gekom waarin gesien kan word hoe die verdagte, in ‘n Ford Ranger-bakkie, die oorledene tref, en dan herhaaldelik bo-oor hom ry. Die polisiewoordvoerder, kolonel Dimakatso Nevhuhulwi, sê die voorval het op 5 April in Rivonia, Sandton gebeur, maar die polisie kon steeds nie die verdagte opspoor nie.
Nevhuhulwi sê die man is op die toneel dood verklaar. Hy sê voorlopige ondersoeke dui daarop dat dit nie ‘n ongeluk was nie.
Die video wys nie wat die gebeure voorafgegaan het nie, maar volgens berigte was daar glo ‘n konfrontasie tussen die betrokke partye.
Nevhuhulwi sê die polisie ondersoek ‘n saak van moord, en het ‘n beroep op mense gedoen om die polisie met enige inligting te kontak.
Indien jy meer inligting oor die verdagte het, skakel Stop Misdaad by 08600 10111.
