‘n Ontruimingsbevel is uitgereik vir inwoners wat langs die Vaalrivier woon as gevolg van die stygende watervlakke.
Die departement van water en sanitasie het op die sosialemediaplatform, X geskryf dat hy genoodsaak was om ‘n vyfde sluis van die Vaalrivier oop te maak, slegs 24 uur nadat die vierde sluis oopgemaak is.
Die damvlakke het die afgelope naweek gewissel tussen 107,82% en 109,39%.
Volgens die departement kan inwoners en boere wat in laagliggende gebiede in die Vaaldriehoek- en Parys-gebied woon, deur oorstromings geraak word.
Die departement het inwoners gemaan om waardevolle toerusting, beweegbare infrastruktuur en vee te skuif om enige moontlike skade of verliese te voorkom.
