20 Desember 2024
President Cyril Ramaphosa het die Bela-wet in sy geheel bekragtig.
Die presidensie het in ‘n verklaring bevestig dat daar geen wysigings gemaak gaan word aan die artikels wat handel oor taal- en toelatingsbeleid nie.
Ramaphosa het die minister van basiese onderwys, Siviwe Gwarube opdrag gegee om die wet te implementeer soos dit in September deur hom onderteken is.
Gwarube is ook opdrag gegee om die nodige norme en standaarde voor te berei.
Volgens die presidensie het alle partye wat deel is van die Regering van Nasionale Eenheid ook ingestem dat die wet toegepas moet word, sonder enige wysigings.
Die RNE se geskilbeslegtingsmeganisme het ook voorgestel dat die wet nie na die parlement teruggestuur moet word nie.
Ramaphosa sê elke kind, sonder uitsondering, moet toegang hê tot behoorlike, gehalteonderwys.
