Marelize Maré
Die voorsitter van die portefeuljekomitee oor internasionale betrekkinge en samewerking, Supra Mahumapelo, sê hy is tevrede dat die polisie die saak van die 17 Suid-Afrikaners wat in die Donbas-streek van Oekraïne vasgekeer is, formeel sal ondersoek.
Die mans is glo deur lede van die MK-party na die oorlogsgeteisterde land gelok.
Oudpresident Jacob Zuma se dogter en MK-partylid, Duduzile Zuma-Sambudla, word daarvan beskuldig dat sy die mans gewerf het wat na bewering gedwing word om in Oekraïne te veg.
Zuma-Sambudla sê egter sy was nie die meesterbrein agter ’n sogenaamde huursoldaatwerwingsprogram na Rusland nie, maar eerder die eerste slagoffer van ’n uitgebreide wanvoorstelling wat daartoe gelei het dat meer as ’n dosyn Suid-Afrikaners nou onder valse voorwendsels na ’n konflikgebied geneem is.
Sy het haar beëdigde verklaring gister by die Sandton-polisiekantoor ingedien, wat teenstrydig met dié van haar suster, Nkosazana Zuma-Mncube, is.
Zuma-Mncube het Zuma-Sambudla en twee ander MK-lede daarvan beskuldig dat hulle die 17 mans bedrieg het om as Russiese huursoldate te gaan veg.
Die mans sou glo as lyfwagte vir die MK-party opgelei word.
Fotokrediet: Darren Stewart/Gallo Images/Getty Images
