AfriForum sê die nuutste verskuiwing van Afrikaanse TV-nuus, op die SAUK, lyk na ondeurdagte en benoude spronge.
Die kommentaar kom na ‘n radio-onderhoud vanoggend op RSG met die Afrikaanse TV-nuusbulletinredakteur, Daniëlle Wass. Sy het ondermeer aangekondig dat die nuwe tydsgleuf op weeksaande van 17:30 tot 18:00 op S3 (voorheen bekend as SABC3) sal wees, en oor naweke van 19:30 tot 20:00.
AfriForum se hoof van kultuursake, Alana Bailey sê die organisasie waarsku die SAUK reeds lankal dat die skuif van uitsaaitye en verandering van kanale kan lei tot ‘n verlies aan kykers en advertensie-inkomste.
“Volgens Wass is die skuiwe van die afgelope jare nie deur deeglike marknavorsing voorafgegaan nie. Dit is ondenkbaar dat wanneer ’n instelling só afhanklik van inkomste is soos wat die SAUK is, drastiese skuiwe geneem word sonder begronde motivering,” sê Bailey.
AfriForum het reeds op 9 April ’n formele aansoek ingevolge die Wet op Bevordering van Toegang tot Inligting (PAIA) aan die SAUK gerig om antwoorde oor die toekoms van Afrikaanse TV-nuusuitsendings te eis.
Volgens Bailey het die organisasie nog nie reaksie op hul aansoek ontvang nie.
