Vanaf 5 April sal luisteraars van Pretoria FM op ‘n Saterdagmiddag ‘n nuwe stem hoor wanneer Pieter Cloete agter die mikrofoon inskuif. Cloete, ‘n bekende mediapersoonlikheid met meer as 16 jaar se ervaring, bring ‘n vars stem en sy besondere menslike aanslag na die stasie.
Hy sal elke Saterdag van 11:00 tot 16:00 luisteraars vermaak met ‘n mengelmoes van topmusiek, interessante gesprekke en die unieke warmte waarvoor hy bekend is.
“Ek is ongelooflik opgewonde om by Pretoria FM aan te sluit en my passie vir radio en musiek met hierdie dinamiese span te deel,” sê Cloete. “Dit is ‘n groot voorreg om my stem te gebruik om ‘n diverse luisteraarsgemeenskap te inspireer en te vermaak.”
Hy het ‘n indrukwekkende agtergrond in die mediawêreld. Cloete was voorheen ‘n musieksamesteller en omroeper by GROOTfm 90.5 en Knysna FM, asook ‘n vervaardiger van verskeie radioprogramme. Hy is tans die videovervaardiger by Maroela Media en besig met sy meestersgraad in Media en Joernalistiek aan die Universiteit van die Witwatersrand.
Met sy kreatiwiteit, ervaring en passie vir die radiowese, beloof Pieter Cloete se Saterdagprogram om ‘n opwindende toevoeging tot Pretoria FM se programskedule te wees.
