9 Februarie 2025
Waarskuwing: Die inhoud van die berig kan sensitiewe lesers ontstel.
Die dood van ‘n bobbejaan, wat die afgelope week in Pretoria rondbeweeg het, ontlok tans groot reaksie op sosiale media.
Die bobbejaan het vinnig bekendheid verwerf in Pretoria, en is Raygun deur inwoners gedoop.
Verskeie foto’s en videos is die afgelope week gedeel van Raygun wat onder meer kerke besoek, in strate rondbeweeg, en is selfs op die dak van die Hoërskool die Wilgers raakgesien. Hy is glo uit sy trop verdryf.
‘n Petisie is nou deur inwoners begin wat geregtigheid vir Raygun eis.
Dit kom nadat ‘n grafiese video opgeduik het waarin gesien kan word hoe skoolkinders van die Botleng Secondary School in Delmas die bobbejaan ondermeer met klippe bestook, met stokke slaan, sy tande uit sy bek skop en dan aan die brand steek deur brandende bande wat op hom gepak is.
Inwoners meen die Dierebeskermingsvereniging en die polisie moet dringend ingryp en die betrokke persone verantwoordbaar hou.
Die omgewingsorganisasie, Owl Rescue Centre het Raygun se reis die afgelope paar dae gevolg, en het gesê dit wil voorkom asof hy binnekort sy weg terug na die wild sou vind.
Die organisasie het in ‘n plasing op Facebook geskryf dat Raygun sy pad veilig gevind het deur woonbuurte, waarna hy uiteindelik ‘n landelike area met natuurreservate gevind het.
“Hy het ongelukkig ‘n verkeerde draai gevat en 40 kilometer tot in Delmas gestap, waar hy by die betrokke skool uitgekom het.”
Volgens die organisasie is ‘n span Vrydag na die skool om Raygun se liggaam te kry sodat hy begrawe kon word. Die span se aankoms was egter nie verwelkom nie, en is hulle gedreig. Die reddingspan het gewag tot die groep skoolkinders die perseel verlaat waarna hulle Raygun gaan haal het.
Hy is op die Owl Rescue Centre se eiendom onder ‘n Maroelaboom begrawe.
“Ons het hom gefaal, en is bitter hartseer oor die manier waarop Raygun dood is. Sy dood kom as ‘n hartseer werklikheid dat daar nog baie werk gedoen moet word om wilde diere te beskerm, en om jong mense op te voed oor die belangrikheid om die diere te beskerm en respekteer.”
Die sentrum se plasing oor Raygun se wrede einde en waar hy begrawe is, is meer as 2 000 keer gedeel en het byna 3 000 kommentare.
