Die voormalige lyfwag van die EFF-leier, Julius Malema, Adriaan Snyman, dagvaar die staat vir R20 miljoen in skadevergoeding in verband met die aanklagte wat voorheen teen hom aanhangig gemaak is.
Snyman was in 2018 ’n medebeskuldigde saam met Malema in die saak wat verband hou met die oortreding van die Wet op Vuurwapenbeheer, nadat Malema ’n vuurwapen in die openbaar tydens die party se verjaarsdagvieringe afgevuur het.
Snyman is verlede jaar Oktober vrygespreek.
Snyman beplan om die hof te nader vir ’n verstekvonnis, aangesien die Nasionale Vervolgingsgesag en die polisie versuim het om binne die spertyd van 30 dae op die eis te reageer.
Volgens Snyman se woordvoerder, Kirsten McLeod, wag hul steeds vir die NVG en die Suid-Afrikaanse Polisiediens (SAPD) om op die skriftelike eis vir betaling te reageer.
“Dit is as gevolg van die kwaadwillige vervolgingsbewering. Ons sal binnekort regstappe instel, en indien hulle nie reageer nie, sal ons aansoek doen vir ’n verstekvonnis,” sê McLeod.
Malema se vonnisoplegging het vandag in Oos-Londen begin.
