10 Oktober 2023
Motoriste in Gauteng kan moontlik steeds verantwoordbaar gehou word vir e-tolgeld as ‘n antwoord in die parlement van die minister van finansies, Enoch Godongwana, eng geïnterpreteer word.
Om verdere onduidelikheid oor die einde van die e-tolstelsel aan te wakker, het Godongwana in antwoord op ‘n vraag van die DA se Dennis Ryder – oor waarom die e-tolhekkie nie afgeskakel word nie – gesê dit sal eers gedoen word sodra daar ‘n bindende ooreenkoms oor die afbetaling van skuld bereik is.
Só ‘n ooreenkoms moet tussen die Gautengse provinsiale regering en die nasionale regering onderteken word oor hoe daar te werk gegaan sal word om die uitstaande skuld te delg.
Vir só ooreenkoms moet provinsiale finansieringsbronne vir die agterstand in instandhouding en rehabilitasie van die netwerk en die duur waaroor dit gedoen sal word aangedui word.
Daar moet ook duidelikheid wees oor die provinsie se posisie oor padgebruikers wat nie e-tol betaal het nie.
Dit dui daarop dat padgebruikers wat nie hul e-tolrekeninge in die loop van die afgelope tien jaar betaal het nie dalk aanspreeklik kan wees om hul skuld te vereffen voordat die skema gesluit word.
Die premier van Gauteng, Panyaza Lesufi het op sý beurt in Januarie vanjaar – toe dit bekend geword het dat die stelselsel geskrap gaan word – verklaar dat gebruikers wat getrou e-tolgeld betaal het, op ‘n manier daarvoor vergoed sal word.
Foto: MyBroadband
