Waarskuwing: Hierdie berig bevat sensitiewe beeld en inhoud
Die Dierebeskermingsvereniging het sedert Augustus verlede jaar verskeie gevalle ondersoek van sogenaamde diere-reddingsorganisasies, wat as niewinsgewende organisasies geregistreer is en daarmee saam donasies insamel, wat diere mishandel en verwaarloos.
DBV-inspekteurs het in die jongste voorval op die Mahanaimfeet Sanctuary in Atlantis in die Wes-Kaap toegeslaan waar hulle 163 honde gered het. Die eienaar, Ockert Kruger, wat ook in 2018 by ’n soortgelyke saak betrokke was, is vir dieremishandeling en dwarsboming van die gereg in hegtenis geneem. Dít volg nadat hy en sy gesin glo probeer het om honde weg te steek met die DBV se aankoms op die perseel.
Kruger het glo herhaaldelik eiendomme gehuur, skuld laat ophoop en dan uitsetting ontduik, terwyl hy die diere as inkomstebron gebruik het.
Die Swellendam-DBV het glo in 2018 ook Kruger se perde in beslag geneem. Daardie hofsaak is nog nie afgehandel nie.
Die DBV sê hy beplan om regstappe teen Kruger te doen en sê hierdie saak beklemtoon die groter probleem van ’n gebrek aan regulering in diereredding.
Foto krediet: DBV
