Die minister van Openbare Werke, Dean Macpherson, sê daar is beduidende vordering in die bekamping van afpersing in die konstruksiesektor, hoewel die stryd nog nie verby is nie.
Hy het twee jaar gelede beloof om teen die sogenaamde konstruksiemafia op te tree en sedertdien is 52 maatskappye op die swartlys geplaas.
Meer as 770 sake van afpersing is landwyd aangemeld, wat tot 241 inhegtenisnemings en 176 skuldigbevindings gelei het.
Macpherson sê ook ‘n nuwe kabinetsgoedgekeurde beleid sal gemeenskappe van die begin af by infrastruktuurprojekte betrek om konflik en afpersing te beperk.
Die geïntegreerde raamwerk vir maatskaplike fasilitering beoog om gemeenskapsdeelname te verbeter, ontwrigting van projekte te voorkom en die rol van maatskaplike fasiliteerders te professionaliseer.
Macpherson sê dit sal dit moeiliker maak vir sogenaamde konstruksiemafia en ander misdadige groepe om onsekerheid en ontevredenheid in gemeenskappe uit te buit.
