Die Nasionale Vervolgingsgesag (NVG) het bevestig dat individue strafregtelik vervolg sal word vir die Life Esidimeni-skandaal.
Dié deurbraak volg na jare se uitgerekte ondersoeke na die dood van minstens 141 psigiatriese pasiënte tussen 2015 en 2016. Die slagoffers is destyds na ander nieregeringsorganisasies en hospitale in Gauteng oorgeplaas, wat as een van die land se ergste menseregtevergrype beskou word.
Volgens die woordvoerder van die NVG, Lumka Mahanjana, is die vertragings deur die omvangryke getuienis en die kompleksiteit van die saak veroorsaak.
Die nasionale direkteur van openbare vervolgings, advokaat Andy Mothibi het sy tevredenheid met die vordering uitgespreek en beklemtoon dat geregtigheid vir die geraakte families in sig is.
