21 Januarie 2025
‘n Geval van phrogging, is volgens die Potchefstroom Herald, onlangs in Potchefstroom aangemeld.
Phrogging beteken dat iemand, sonder jou medewete, vir ‘n geruime tyd in jou huis woon. Die persoon is dikwels aanvanklik ‘n inbreker wat dan besluit om meer permanent te bly. Die huis kan beset wees of leeg staan.
Volgens die Potchefstroom Herald het ‘n vrou onlangs in ‘n huis op die dorp gewoon sonder dat die eienaar daarvan bewus was.
Die koerant gee hierdie raad oor wat om te doen indien jy vermoed dat iemand, sonder jou toestemming of medewete, in jou huis woon:
- Soek moontlike wegkruipplekke in jou huis, en kyk ook vir tekens van gedwonge toegang of enige ongewone items.
- Verhoog veiligheidsmaatreëls
- Praat met jou bure
- Kontak die owerhede.
Volgens ‘n artikel op die webblad, Cupcakes and Chaos is die daad van phrogging meer algemeen as wat ‘n mens sou verwag. ‘n Onlangse dokumentêr: Phrogging: Hider in My house het 10 gevalle gevolg waarin mense onwetend “gaste” in hulle huise gehad het.
In die betrokke episodes het die huiseienaars gesê dat hulle vreemde dinge opgemerk het, soos toiletsitplekke wat opgeslaan is, en kos wat verdwyn.
