13 Januarie 2024
‘n Onderwysaktivis, Hendrick Makaneta het ‘n beroep op die departement van basiese onderwys gedoen om dringend ‘n interne ondersoek te doen na bewerings dat ‘n private entiteit matriekuitslae verkoop.
Dit volg op ‘n plasing op sosiale media wat beweer dat die resultate aanlyn vir R100 verkry kan word. Die amptelike uitslae word môre, 14 Januarie, deur die onderwysdepartement bekend gemaak.
Die departement het nog nie op dié bewerings gereageer nie.
Makaneta sê as die bewerings waar is, dui dit op ‘n potensiële skending van dataveiligheid en ‘n skending van leerders se reg op privaatheid.
Hy sê die verkoop van uitslae – hetsy wettig of nie – ondermyn die publiek se vertroue in die onderwysstelsel en skep twyfel oor die departement se vermoë om sy stelsels te beveilig.
Onthou om by Pretoria FM se WhatsApp-kanaal aan te sluit om elke Vrydag ons nuwe, gratis e-koerant, Nuusweek, te ontvang. Hou ook môreoggend, 14 Januarie die kanaal dop vir die matriekuitslae in ‘n spesiale, eerste uitgawe van Nuusweek. WhatsApp-kanaal: https://whatsapp.com/channel/0029VajTu2qHrDZZouFYOJ0Q
